თბილისში მიმდინარე ITF 25-ტიპის ტურნირზე ალექსანდრე მეტრეველმა ბრწყინვალე თამაშით ფინალის საგზური მოიპოვა.
ნახევარფინალურ მატჩში სანდროს მეტოქე მსოფლიოს ყოფილი 79-ე ნომერი, პრაჯნეჩ გუნენსვარანი იყო, რომელიც ქართველმა ულამაზეს სტილში და ორ სეტში, 7:6 6:2 დაამარცხა.
მეტრეველმა ამ შეხვედრაში 4 ეისი მოაწოდა, 4 ბრეიკ-პოინტიდან 3 გამოიყენა, მეტოქეს ყველა მნიშვნელოვან კომპონენტში აჯობა და ფინალში სრულიად დამსახურებულად გავიდა.
გადამწყვეტ მატჩში მეტრეველის მეტოქე 23 წლის პოლონელი კასპერ ჟუკი იქნება, რომელიც მსოფლიოში 266-ე პოზიციას იკავებს და ამ ტურნირზე პირველ ნომრად არის განთესილი.
თავის ნახევარფინალში ჟუკმა ჩეხ დავიდ პოლიაკს მძიმე ბრძოლაში, 3:6 7:5 7:6 (7) მოუგო.
ფინალური შეხვედრა მზიურის საჩოგბურთო კომპლექსის ცენტრალურ კორტზე ხვალ, 6 აგვისტოს, 12:00 საათზე დაიწყება.
ერთად ვუგულშემატკივრობთ სანდრო მეტრეველს ამ უმნიშვნელოვანეს დაპირისპირებაში.